АНУ, ИХ БРИТАНИД СОЦИАЛИСТ БОДЛОГЫН НӨЛӨӨ НЭМЭГДЭЖ БАЙНА

АНУ, Их Британийн улс төрд социалист болон төрийн оролцоог нэмэгдүүлэх чиг хандлага дахин хүч авч байна. Нью-Йорк хотод ардчилсан социалистууд Ардчилсан намын сунгаанд ялалт байгуулж, Вашингтон хот мөн социалист чиг баримжаатай хотын даргатай болох магадлал нэмэгдэв.

Их Британид энэ өөрчлөлт илүү тод харагдаж байна. Манчестерийн захирагч асан Энди Бёрнхэм Лейборист намын шинэ удирдагч, улмаар Ерөнхий сайд болох магадлалтай бөгөөд тэрээр нийтийн тээвэр, ус, орон сууц, эрчим хүч зэрэг стратегийн салбарт төрийн өмч, хяналтыг нэмэгдүүлэх байр суурьтай юм.

Инфляц, амьжиргааны өртөг, геополитикийн эрсдэл, үндэсний аюулгүй байдлын шалтгаанаар стратегийн салбарт төрийн хяналт шаардлагатай гэх үзэл хүчтэй болж байгаа бөгөөд шинжээчдийн үзэж буйгаар төрийн өмчлөл, үндэсний болгох бодлого зөвхөн зүүний улс төрийн хүрээнд бус, барууны популист урсгалд ч дэмжлэг авч байна.

Социалистуудын өсөлт нь тэдний эдийн засгийн хөтөлбөр бүх нийтээр дэмжигдсэнээс бус, төвийн улс төрийн хүчнүүд сонгогчдын итгэлийг сэргээж чадаагүйтэй холбоотой юм. Төр үйлдвэрлэлийн хэрэгслийг хянах тухай үзэл өмнө нь улс төрийн хүрээнд маргаантай, зарим талаар няцаагдсан байр суурь байсан бол өнөөдөр баруун, зүүний аль алинд нь дахин хэлэлцэгдэх болсон нь гол өөрчлөлт болж байна.