ХИЙМЭЛ ОЮУНААР БҮТЭЭСЭН СОНГУУЛИЙН СУРТАЛЧИЛГААГ ТАНИХАД УЛАМ ХҮНД БОЛЖ БАЙНА
@Economist
АНУ-ын улс төрийн кампанит ажлууд нэр дэвшигчдээ дэмжих, өрсөлдөгчдөө гутаах зорилгоор хиймэл оюунаар бүтээсэн дүрс, бичлэгийг өргөн ашиглаж эхэлсэн нь завсрын сонгуулийн үнэн зөв байдалд эрсдэл учруулж болзошгүй гэж шинжээчид анхааруулжээ: Техасын Сенатын сонгуульд нэр дэвшигч Жеймс Талариког трансжендер хүүхдүүдийг магтан дуу дуулж буй мэт, Мичиганы нэр дэвшигч Майк Рожерсийг барилгаас хүмүүс аварч буй “Халк” дүрээр харуулсан хиймэл бичлэгүүд тархсан байна. Мөн Лос-Анжелес хотын захирагчид нэр дэвшсэн Спенсер Праттыг “Бэтмэн”, одоогийн захирагч Карен Бассыг “Жокер” болгон дүрсэлсэн бичлэг олон нийтийн анхаарлыг татжээ. Миннесота мужийн дэд захирагч Пегги Фланаганыг томоохон компаниудаас хандив авч буй мэтээр дүрсэлсэн хиймэл сурталчилгаа ч гарсан байна. Миннесота зэрэг 30 орчим муж сонгуультай холбоотой дипфэйкийг хязгаарласан хуультай боловч үзэл бодлоо илэрхийлэх эрхийн хамгаалалттай зөрчилдөх эрсдэлээс шалтгаалан хэрэгжилт нь хүндрэлтэй хэвээр байна.
Судлаачдын үзэж буйгаар хүмүүс өөрсдийн өмнөх итгэл үнэмшилтэй нийцсэн хуурамч мэдээлэлд илүү амархан итгэдэг. Харин худал болохыг нь няцаах оролдлого тухайн агуулгыг улам олон хүнд хүргэх сөрөг нөлөөтэй байж болзошгүй. Нийгмийн сүлжээний платформууд агуулгын хяналтаа сулруулж байгаа нь нөхцөл байдлыг улам хүндрүүлжээ. Зарим сурталчилгаанд “хиймэл оюунаар бүтээсэн” гэх жижиг тайлбар байршуулдаг ч энэ нь үзэгчдэд тэр бүр анзаарагддаггүй байна. Шинжээчдийн дүгнэснээр дүрс, дуу хоолой улам бодитой болохын хэрээр сонгогчид жинхэнэ болон зохиомол агуулгыг ялгахад улам хүндрэлтэй болж, улс төрийн туйлшрал, сонгуулийн талаарх үл итгэх байдал нэмэгдэх эрсдэлтэй байна.
