ТӨВДИЙН ТАЛААРХ МЭДЭЭЛЛИЙН ӨРСӨЛДӨӨНД ХИЙМЭЛ ОЮУНЫ АЛГОРИТМД ДАСАН ЗОХИЦОХЫГ УРИАЛАВ

Төвдийн талаарх мэдээллийн өрсөлдөөнд БНХАУ амжилт гаргахын тулд барууны цахим платформын алгоритмтай тэмцэх бус, түүнд дасан зохицсон харилцааны стратеги хэрэгжүүлэх шаардлагатай гэж Хятадын төрийн өмчит Олон улсын харилцааны бүлгийн мэргэжилтэн Закари Лундквист мэдэгджээ. Тэрбээр Лхас хотноо болсон Шизангийн олон улсын харилцааны хоёрдугаар бага хуралд оролцохдоо Төвдийн талаарх Бээжингийн мэдээлэл түгээхэд хамгийн том саад нь зөвхөн барууны улс төрийн эсэргүүцэл бус, харин цахим платформуудын өөрөө бэхждэг зөвлөмжийн алгоритм болж байна гэж онцолсон байна. Барууны хэрэглэгчид “Tibet” гэж хайхад алгоритм тэднийг өмнө нь улс төржсөн агуулга руу чиглүүлдэг бөгөөд энэ нь “мэдээллийн хаалттай орчин” үүсгэдэг гэж тэрбээр тайлбарлав. Иймээс Хятадын хэвлэл мэдээлэл өргөн хүрээний сурталчилгаанаас татгалзаж, тодорхой сонирхлын бүлэгт зориулсан агуулга боловсруулах хэрэгтэй гэж үзжээ:соёл сонирхогчдод танка урлаг, биет бус өвийг, эдийн засаг, бодлого сонирхогчдод дэд бүтэц, аялал жуулчлалын хөгжлийг, эргэлзэгчдэд бодит тоо баримтад тулгуурласан тайлбарыг хүргэх шаардлагатай гэжээ. Мөн экологи, боловсрол, охидын суралцах боломж, өндөрлөг бүсийн хөгжлийн асуудлыг олон улсын судлаачид, төрийн бус байгууллага, байгаль орчны идэвхтнүүдэд чиглүүлэн түгээхийг санал болгосон байна. Бээжингийн хувьд Төвдийг Өмнөд Азитай холбогдох нээлттэй гарц, “Бүс ба зам” санаачилгын чухал зангилаа болгон танилцуулах нь мэдээллийн бодлогын шинэ чиглэл болж байна.