ТӨВ БАНКУУД АЛТНЫ НӨӨЦӨӨ ЭХ ОРОНДОО ТАТАХ ХАНДЛАГА НЭМЭГДЭВ

Геополитикийн тогтворгүй байдал, олон улсын хориг арга хэмжээ, улс орнуудын харилцан итгэлцэл буурч байгаатай холбоотойгоор төв банкууд гадаадад хадгалуулсан алтны нөөцөө эх орондоо татах, хадгалалтын байршлаа төрөлжүүлэх хандлага нэмэгдэж байна. Дэлхийн алтны зөвлөлийн судалгаагаар төв банкуудын 19 хувь нь өнгөрсөн нэг жилийн хугацаанд дотоодын алт хадгалалтаа нэмэгдүүлсэн буюу гадаад дахь хадгалалтын газраа төрөлжүүлжээ. Франц 2025 оны долоодугаар сараас 2026 оны нэгдүгээр сарын хооронд Нью-Йоркоос 129 тонн алтаа шилжүүлж, нөөцөө бүхэлд нь дотооддоо хадгалдаг болсон байна. Энэтхэгийн Нөөцийн банк ч сүүлийн гурван жилд гадаадад хадгалуулсан алтныхаа дийлэнхийг эх орондоо татжээ. Шинжээчдийн үзэж буйгаар энэхүү өөрчлөлт нь төв банкууд алтаа бүрэн хянах боломжоо баталгаажуулах, улс төрийн болон санхүүгийн эрсдэлийг бууруулах зорилготой. Ийнхүү алтны хадгалалт нь зөвхөн санхүүгийн бус, үндэсний аюулгүй байдал, эдийн засгийн тусгаар тогтнолын асуудал болж байна.